Sumir réttir standast einfaldlega allar kröfur og væntingar. Þessi pasta réttur er bæði einfaldur að gera og fljótlegur, auðfáanleg hráefni og þar að auki ofsalega bragðgóður.
Gott er að gera stóran skammt af réttinum því hann er frábær sem nesti.
INNIHALD (fyrir 4)
500 gr. pasta af eigin vali, undirrituð notar yfirleitt tagliatelle
10 sneiðar af beikoni
1 krukka grænt pestó
Handfylli af ólívum, grænum eða svörtum
Fetaostur, eftir smekk. Einnig hægt að nota mozarella.
1 lítil smjörklípa
2 msk. sykurbaunir, skornar gróft
AÐFERÐ
Sjóðið pastað samkvæmt venju, látið vatnið renna af, setjið litla smjörklípu í og hrærið vel-látið svo pastað standa. Steikið beikonið á miðlungshita. Athugið að ekki er þörf að setja olíu eða slíkt á pönnuna, fitan í beikoninu sjálfu nægir. Þegar beikonið er tilbúið skal skera það í litla bita. Því næst er pestóinu hrært saman við pastað og í kjölfarið beikonbitunum. Að því loknu er olívunum bætt við, sykurbaunir skornar gróft og settar í og loks er fetaostinum dreift yfir. Bera má fram réttinn heitan sem kaldan.
HEILRÆÐI
Þar sem að mikil olía er í pestóinu og beikoninu er best að nota fetaost sem liggur í léttsöltuðu vatni, þ.e. ekki þann sem er í olíulög. Ef aðeins er til fetaostur í olíu er gott að láta olíuna renna af eða sigta hana úr.
Yndislega auðveldur réttur sem enga stund tekur að töfra fram og njóta með glasi af hvítvíni, í góðra vina hóp.
Fjölbreytileiki og góður fílíngur er mottó Pjattsins. Engar smellabeitur, bara endalaust af góðu efni, blogg, pistlar, uppskriftir, heilræði, heilsutips, menning, bækur, andlega hliðin og allskonar, allskonar enda höfum við verið í loftinu síðan 2009.
