Þessi dásamlega góða kaka hefur lengi verið í uppáhaldi hjá mér og hittir hún alltaf í mark hvort sem það er í barnafmælum eða saumaklúbbnum.
Granateplakaka er einföld kaka sem allir ættu að geta gert leikandi og kostur hennar er að hún er virkilega bragðgóð, einföld að búa til og inniheldur einungis fjögur hráefni.
INNIHALD
1 pakki LU kanilkex
2-3 stk Jonar gold epli
1 peli rjómi
1 stórt granatepli
AÐFERÐ
1. Byrjað er á því að mylja kanilkexið gróflega niður í form.
2. Því næst eru eplin afhýdd og rifin niður með rifjárni og eplin lögð jafnt og þétt yfir kexið.
3. Þeytið rjómann vel og leggið hann yfir eplin.
4. Að lokum er granateplið skorið í tvennt og kjarni þess tekinn úr ( litlu rauðu berin innan í eplinu) og þau svo lögð yfir rjómann.
Best er að geyma kökuna ljúffengu í kæli í um tvær klukkustundir áður en hún er borin fram, þá fær kexbotninn að blotna vel og kakan verður sem allra best.
Verði ykkur að góðu!
Una Dögg Gudmundsdòttir er 28 àra Seltirningur sem býr nú í Vesturbæ ásamt eiginmanni og tveimur dætrum, 7 og 2 ára.
Una Dögg lauk BA prófi í félagsráðgjöf frá Háskóla Íslands, en verandi pjattrófa inn að beini hefur hún einnig lært nagla og förðunarfræði. Una elskar að baka og elda en henni finnst best að hafa uppskriftirnar einfaldar, fljótlegar og auðvitað dásamlega góðar.
