Stella McCarntney er ekki bara dóttir pabba síns heldur fyrir löngu búin að stimpla sig inn í heim tískunnar og hefur hún vakið heimsathygli fyrir fágaða og umhverfisvæna hönnun.
Þessi töffari er líka með einstaklega gott nef, því á undraverðan hátt hefur henni tekist að fá rósailm aftur í tísku og þessi er alveg laus við “kerlingailms-stimpilinn” sem fylgt hefur rósarilm lengi -enda bara alveg passlega mikill rósarilmur af honum.
Stella er kryddaður og ferskur blómailmur með aðaltón rósablaða blandað við peony og tangerínu.
Þegar maður fyrst spreyjar honum virðist lyktin sterk en eftir smástund er hún orðin mild og einstaklega góð. Þetta er munúðarfullur, sérstakur og notalegur ilmur sem ég get vel mælt með fyrir konur á öllum aldri.
Glasið er eins og önnur hönnun Stellu McCartney -fágað, aðlaðandi og fallegt.
Vala vinnur hjá 66 Norður, er menntaður innkaupastjóri og faglegur ráðgjafi hönnuða í öllu sem snýr að viðskiptum og markaðssetningu. Hún er krabbi, fædd árið 1979 og montin mamma tveggja stráka. Býr í 101.
