TOMASZ VERUSON: Við höfum lifað ‘share’ lífi frá því Facebook kom út

Tomasz Þór Veruson hefur á undanförnum misserum orðið eftirsóttur ljósmyndari bæði hérlendis og erlendis. Hann sérhæfir sig í tísku-og portrettljósmyndun og hefur meðal annars myndað fyrir rússneska Harper’s Bazaar, The Balde á Spáni og Mannlíf.

Tomasz er af pólsku bergi brotinn, uppalinn á Íslandi og setur hamingjuna í fyrsta sætið.

Hvað kom til að þú gerðist ljósmyndari?

Ég hef alltaf haft áhuga á ljósmyndun, að festa augnablikin í kringum mig á filmu/flögu. Fiktið tók svo loks yfir og ég sökkti mér alveg í þetta. Áður en ég vissi var ég búinn að opna stúdíó og farinn að mynda fyrir aðra. Fyrir utan áhugan þá hef ég alltaf haft þörf fyrir því að kynnast nýju fólki, heyra sögu þess o.fl. Því finnst mér ég ná með myndavélinni.

Hvað finnst þér skemmtilegast að mynda?

Ég er portret- og tískuljósmyndari og er það alltaf efst í huga, nýt mín best á því sviði og finnst það rosalega spennandi. Í frítímanum er svo fátt betra en að skella sér út og mynda fallega landslagið sem við höfum hérna í kringum okkur.

Hvaða ljósmyndari hefur haft mest áhrif á þig?

Ljósmyndarar sem ég lít mikið upp til eru þónokkrir, bæði fyrir fallegar myndir sem þeir skapa en einnig fyrir persónuleika þeirra og viðhorf til ljósmyndunar. Menn eins og Ragnar Axelsson finnast ekki á hverju strái eða Solve Sundsbo sem að mínu mati er einn fremsti tískuljósmyndari okkar tíma. Svo má ekki gleyma Annie Leibovitz sem býr ekki til ljósmyndir heldur listaverk.

Áttu þér eftirlætis ljósmynd?

Þetta er erfitt val þar sem ég held upp á margar af mínum myndum, ef eitthvað gengur vel upp þá er maður ánægður. En ef ég á að nefna eitthvað þá koma strax tvær upp í huga: Portret sem ég skaut síðasta sumar. Það er af Eddu Óskars, módeli sem er að gera góða hluti um þessar mundir erlendis. Þegar gott fólk kemur saman verða til góðir hlutir, ég vil meina að það hafi gerst í þessu tilfelli. Edda rokkaði módelpartinn, Iðunn, förðunardaman mín sá um að hún liti vel út og ég ýtti á takkan á myndavélinni…og til varð þessi rammi. Hin er svo brúðkaupsmynd frá síðasta ári af vinkonu minni og manni hennar, þá mynd þykir mér mjög vænt um.


Lifir þú á því að mynda?

Ég er hamingjusamur, ljósmyndun færir mér hamingju og ég lifi hamingjusömu lífi. Skiptir það ekki öllu máli…? 🙂


Hvað finnst þér um forrit eins og Instagram?

Ég nota þessi litlu “Öpp” mjög mikið til að skrá mitt daglega líf, með símann minn á lofti lifi ég oft í gegnum hann. Þessi tækni sem við erum að ganga í gegnum finnst mér algjör snilld, hún auðveldar fólki að koma sínu á framfæri og deila með öðrum…enda höfum við lifað “share” lífi frá því Facebook kom út.

Notarðu stundum gömlu aðferðina, myrkraherbergi, filmur?

Ég nota filmu í mjög litlu mæli, eiginlega alltof litlu miðað við hvað ég nýt þess mikið. En um þessar mundir snýst allt um digital.

Draumaverkefnið?

Þetta þarf ég ekki einu sinni að hugsa mig um, svarið er einfalt: Mig langar að komast í samstarf við Tom Ford. Það er hönnuður sem ég hef litið upp til í langan tíma, er rosalega hrifinn af hönnun hans og draumurinn væri að fá að mynda fyrir snillinginn. Held við gætum gert ansi góða hluti saman.

Hvaða lífsreglum lifirðu eftir?

Við eigum bara þetta eina líf – njótum þess!
#hastöggineinfaldalífið
Nýjast
Total
0
Deila
0
0
0
0
Verified by MonsterInsights