RFF: Kormákur og Skjöldur – Hnausþykk ullarefni, slaufur, bindi og klútar

Segðu mér aðeins frá nýju línunni: Haust 2012 línan er töluvert stærri en fyrstu tvær línur Kormáks & Skjaldar merkisins. Nú hefur verið settur fullur kraftur í merkið og unnið að því allt árið. Línan inniheldur því skyrtur, jakkaföt, staka jakka, vesti og buxur, frakka, slaufur, bindi, klúta o.s.frv. Breið og fín lína. Enn frekari áhersla hefur verið lögð á að vinna með bestu fáanleg efni, en við erum komnir í samstarf við Harris Tweed og eins Holland and Sherry of Savile Row. En Holland and Sherry eru meðal allra virtustu efnaframleiðenda heimsins og hafa sinnt klæðskerum af Savile Row í London síðan 1836. Harris Tweed þekkja flestallir, heimsins þekktustu ullarvefarar. Handofin og hnausþykk ullarefni frá Skotlandi. Einnig vinnum við með framúrskarandi klæðskerum hér á Íslandi sem sjá um að vinna sýnishorn og fullkomna sniðin. Varðandi innblástur línunnar er best að segja ekki of mikið, það fer ekki á milli mála ef þið sjáið sýninguna þann 30. mars.

Hvar lærðir þú? Ég er útskrifaður með B.A gráðu í fatahönnun frá Listaháskóla Íslands. Þess utan hef ég lært margt og mikið af fólkinu sem ég vinn með daglega.

Hvert stefnir þú? Stefna framtíðarinnar er ekki ákveðin, eina sem ég veit um framtíðina er að ég á bókaða veiði 7 daga á ári í uppáhalds ánni minni næstu tíu árin. Þess utan vonast ég til að gera Kormáks & Skjaldar merkið að glæsilegu merki sem getur sinnt íslenskum karlmönnum og glatt, vonandi erlenda líka á næstu árum.

Hvers vegna valdir þú að verða fatahönnuður? Ég get ekki sagt að ég hafi valið að verða fatahönnuður, það bara gerðist. Veit ekki alveg hversvegna. Ég hef áhuga á fötum, smáatriðum, heildarmynd og hugarheimum.

Hvers vegna takið þið þátt í RFF? Við tökum þátt í RFF til að leggja grunn að því sem koma skal, taka þátt og efla íslenskan tískuiðnað. RFF er flottur stökkpallur á næsta stig fyrir merkið og þangað erum við á leiðinni. Við hlökkum til.

Stjörnumerki þitt og áhugamál fyrir utan tísku? Ég er sporðdreki í allri sinni merkingu. Áhugamál mín eru töluvert karlmannlegri en starfsvettvangur minn, veiði, skíði, fótbolti. Þess á milli er ég alltaf með eitthvað á heilanum. Það er oft stutt í þráhyggju hjá mér.