Jólasýning Árbæjarsafnsins hefur notið mikilla vinsælda undanfarin misseri þar sem er hægt að kynnast jólunum eins og þau voru í gamla daga.
Meðal þess sem er hægt að sjá á safninu er hvernig kerti eru búin til úr tólg, börn jafn sem fullorðnir sitja við laufabrauðsútskurð, hægt er að sjá fólk prjóna og spinna, bragða á hangiketi ásamt því að kaupa sér heitt kakó og kleinur. Klukkan 15:00 hefst svo gamanið þar sem gengið er hringinn í kringum jólatréð með tilheyrandi undirspili og að sjálfsögðu kíkja jólasveinarnir til byggða og taka þátt í herlegheitunum.
Ekki má gleyma því að þeir sem vilja skella sér í messu geta farið í gömlu Árbæjarkirkju klukkan 14:00 og er sniðugt fyrir fermingarbörn að grípa tækifærið og fá stimpil í bókina.
Fyrir þau sem vilja skella sér er sýningin opin sunnudagana 4., 11. og 18. desember kl. 13:00-17:00.
Sigrún Þöll Þorsteinsdóttir (f.15 feb 1975 – d. 8 apríl 2014) bloggaði á Pjatt.is í rúmlega tvö ár.
Sigrún Þöll starfaði sem tölvunarfræðingur, var dellukona, tækjasjúk og fagurkeri af lífi og sál. Að eigin sögn fannst Sigrúnu gaman að hlaupa, hjóla, drekka kaffi, huga að heilsunni, prjóna, lesa, taka ljósmyndir, rækta garðinn sinn og fleira og fleira. Blessuð sé hennar minning. Sigrún verður ógleymanleg þeim sem kynntust þessari dásamlegu konu.
