Mig langar að byrja á því að viðurkenna að ég er ekki þekkt fyrir að vera sú meðvitaðasta þegar kemur að matarræði. Á mínum borðum er venjulegur íslenskur heimilismatur (hvað sem það nú er) og lífrænt fæði er mér framandi.
Ég er týpan sem hef ekki mikið “nennt” að pæla i svona löguðu.
En sem betur fer fór ég nú allt í einu að hugsa meira um þessa hluti. Nú tek ég lýsi og nokkrar tegundir af vítamínum á hverjum degi og já ég borða morgunmat!
Þið skiljið að hér er um lítil hænuskref í rétta átt að ræða. Til dæmis langar mig að fara að skipta út hveiti fyrir heilhveiti og bygg.
En að ég skuli hafa gengið það langt að leggjast í brauðbakstur kom sjálfri mér á óvart! Brauðbakstur er mér nefnilega jafn framandi og lífrænt fæði.
Þessi uppskrift hérna er svo “idiot-proof” og samt svo góð að ég bara varð að deila henni með ykkur!
Hafra- og byggbrauð
4 dl byggmjöl
*1 dl graskersfræ
1 dl hörfræ
*l dl sólblómafræ
1 dl tröllahafrar eða haframjöl
1 msk vínsteinslyftiduft
1 1/2 tsk kúmen
1/2 tsk salt
2-3 msk hunang
2 1/2 dl vatn
1 msk sítrónusafi
Hitið ofninn í 180°C. Blandið þurrefnunum saman í skál ásamt hunangi, hellið vatni og sítrónusafa út í og hrærið þessu rólega saman. Setjið í smurt brauðform. Bakað við 180° í um 35-40 mínútur.
Þetta er alveg fáránlega einfalt og hollt brauð. Enginn sykur, ekkert ger, ekkert hveiti. Og svo var ég svo sniðug að ég keypti svona blandaðan fræpoka og setti bara 3 dl. af þeim út í deigið. Það gerir uppskriftina ennþá einfaldari.
Já, þetta þarf ekki að vera flókið!
Eva er menntuð sem sviðslistakona úr Fræði og framkvæmd frá Listaháskóla Íslands og menningarmiðlari úr Hagnýtri menningarmiðlun frá Háskóla Íslands. Eva er líka mikill fagurkeri enda fædd í vogarmerkinu.
