Fátt jafnast á við góða fiskisúpu svo dásamlegar og saðsamar sem þær geta verið. Súpan er full af próteini og vítamínríku grænmeti og því afar holl og seðjandi.
Þessa súpu geri ég oft, jafnt hversdags sem og þegar ég á von á gestum en uppskriftina að henni er einnig að finna í matreiðslubókinni minni Eldað af lífi og sál.
Súpan slær alltaf í gegn enda einstaklega ljúffeng. Best finnst mér að hafa nóg af grænmeti í súpunni og um að gera að leyfa hugmyndafluginu að njóta sín í þeim efnum. Stundum bæti ég við grænmetistegundum, eins og brokkolí, blaðlauk eða blómkáli og breyti kryddunum þegar mig langar í virkilega bragðsterka súpu en fiskurinn á þó auðvitað að njóta sín.
Uppskriftin er fyrir fjóra
- 5-600 g fiskur (hvaða tegund sem er)
- 100-150 g rækjur
- ½ msk. ólífuolía
- 1 laukur, smátt saxaður
- 1 paprika (hvaða lit sem er), kjarnhreinsuð og skorin smátt
- 2-3 gulrætur, smátt skornar
- 2-3 hvítlauksrif, marin
- 1 dós niðursoðnir tómatar
- 8 dl mjólk
- 2 dl matreiðslurjómi
- (1 ½ dl hvítvín)
- 2 fiskiteningar
- 1 tsk. timjan
- ½ dl fersk steinselja, smátt söxuð
- salt og grófmalaður pipar
Mýkið lauk og hvítlauk í ólífuolíunni í potti við vægan hita. Bætið gulrótunum og paprikunni saman við og síðan tómötunum. Látið malla í nokkrar mínútur. Bætið mjólkinni útí og fiskiteningunum. Kryddið með timjan, salti og pipar og bætið síðan matreiðslurjómanum út í. Ef þið viljið nota hvítvín í súpuna þá minnkið annan vökva, mjólk eða matreiðslurjóma sem því nemur, td. um 1 og ½ dl. Hvítvíninu er þá bætt út í um leið og matreiðslurjómanum. Bætið loks fiskinum og rækjunum út í súpuna og látið rétt hitna í gegn áður en súpan er borin fram.
Gott er að gera grunninn að súpunni (allt nema rjómann, hvítvínið og fiskinn og rækjurnar) með nokkrum fyrirvara, td. nokkrum klukkustundum eða daginn áður og þá er hún geymd í kæli og hituð upp með öllu sem fer í hana.
Stráið ferskri steinselju yfir áður en hún er borin fram.
Rósa starfaði um árabil sem blaða- og fréttamaður lengst af hjá fréttastofu Stöðvar tvö og Bylgjunnar. Hún hefur skrifað um mat og matargerð í ýmis blöð og tímarit, þar af í rúman áratug fyrir Gestgjafann. Rósa gaf út sína fyrstu matreiðslubók, Eldað af lífi og sál, haustið 2009. Nú starfar Rósa við ritstörf hjá Bókafélaginu og er bæjarfulltrúi í Hafnarfirði.
