Síðasta sunnudag skelltum við frumburðurinn okkur á jólaleikritið “Ævintýrið um Augastein” sem nú er sýnt í Tjarnarbíó.
Fyrir vikið komum við feðgin mun fróðari um jólasveinana til baka en Ævintýrið um Augastein er tíu ára gamalt barna og fjölskyldu leikrit sem hefur oftar en ekki verið sýnt á aðventunni.
Felix Bergson fór með aðalhlutverkið þegar það var frumsýnt fyrir tíu árum en núna sér Orri Huginn Ágústsson um aðalhlutverkið og leysir hann það með glæsibrag. Leikritið fjallar um okkar elskulegu jólasveina og hvers vegna þeir gefa góðum börnum í skóinn í dag en litlu börnin geta þakkað Augasteini fyrir það.
Jólasveinarnir eru kynntir með söng og frásögn Orra -ásamt því að kór Vox Arena syngur undir og ég verð að segja að kórinn setur einleikinn á annað plan -mjög vel útfærð tónlistin í leikritinu og ótrúlega gaman að hlusta á.
Leikmyndin er einföld en vel útfærð og það er búið að hugsa út í hvert einasta smáatriði, brúðurnar eru vel gerðar og karakter jólasveinanna sést vel ásamt því að Orri leikur hlutverk þeirra einkar vel. Grýla og jólakötturinn koma að sjálfsögðu við sögu í leikritinu en ég fékk að vita ástæðu þess hvers vegna fólk “fer í jólaköttinn” eftir leikritið.
Ég vil þó ekki segja of mikið um hvað leikritið fjallar en við fáum meðal annars að vita ástæðuna sem liggur að baki því að jólasveinarnir hættu að haga sér illa og stela á aðventunni.
Ævintýrið um Augastein er frábært jóla og aðventuleikrit og tilvalin skemmtun fyrir unga sem aldna, ég mæli hiklaust með því að bjóða ungviðinu Tjarnarbíó og eyða klukkutíma eða svo með Orra sem leikur einleikinn af stakri snilld en þú getur nálgast miða á leikritið hér.
Rannveig er útskrifuð sem hársnyrtir en leggur nú stund á nám í fjölmiðlafræði. Henni finnst fátt skemmtilegta en að stunda margskonar líkamsrækt og er ekki hrædd við það að prófa nýjungar í þeim efnum, Rannveig er þessi týpíska meyja sem verður að hafa allt tip top, ofur pjöttuð að mati margra en lætur sér fátt um það finnast. Hún á tvo stráka og er harðgift.
Fylgdu Rannveigu á Instagram rannveigjonina og á Twitter @MissisRannveig
