Rihanna syngur um S&M, Khloe Kardashian vill feta í fótspor Kim og gera kynlífsmyndband og önnur hver kona liggur og flettir 50 Shades of Gray – er maður ekki í takt við tímann nema bundin með leðuról um hálsinn og í gúmmídressi frá toppi til táar?
Er Bella kannski bara algjör “Plain Jane” með vanillubragði!
Kynlíf para og hjóna eða hið “gamla og góða einnar nætur gaman” er ekkert feimnismál lengur. Fólk talar um kynlíf sitt eins og það sé hluti af daglegu rútínunni. Gunna sem er ósköp venjuleg og hæglát kona sýnir sýnar villtustu hliðar í rúminu og á stóran og stæðilegan dótakassa sem hún skammast sín sko alls ekki fyrir – hún er jafnvel til í að gefa þér góð ráð um hvaða egg er best, gott ef hún vill ekki bara lána þér einhver af sínum!
Gunna segist hreinlega breitast í allt aðra persónu þegar hún stígur inn í svefnherbergið og er búin að gíra sig upp fyrir kvöldið:
Af hverju ekki? spyr hún. Maðurinn minn er frábær bólfélagi og við elskum að gera eitthvað “öðruvísi” og skömmumst okkar alls ekki fyrir það. Ef eitthvað er gott og skemmtilegt, af hverju ekki að láta það eftir sér?
Bella dagsins varð ein augu. Jahá!
Gunna hélt áfram:
“Stripparastöng er líka æðisleg. Þú getur smellt henni upp í loftið hjá þér og tekið hana síðan niður – mamma þín og pabbi þurfa ekkert að sjá hana blasa við þegar þau koma í heimsókn, já og krakkarnir… feldu hana bara á öruggum stað.”
Gunna sagði líka að margar konur fíluðu þetta. Nokkrar vinkonur hennar segjast æsast við það að láta binda fyrir augun á sér. Þær fíla að fara í hlutverkaleiki, þykjast vera til dæmis vera ókunnug á bar, fá flengingar, láta horfa á sig og svo margt margt fleira.
Allir, eða að minnsta kosti mjög margir, virðast tala um kynlíf sitt hispurslaust núna. Þegar nokkur vínglös hafa runnið ljúft niður opnast málgáttirnar og fólk segir frá öllu og engu sem viðkemur kynlífi þeirra – blygðunarlaust, svo blygðunarlaust að sumir (t.d. Bellan sem þetta skrifar) fær bolta í hálsinn og kemur ekki upp orði.
En það er verkefni fyrir höndum. Bella ætlar að reyna að hætta þessum tepruskap. Byrja hægt, jafnvel bara láta binda fyrir augun og sjá hvað gerist. Leðurgallinn bíður hinsvegar betri tíma… hún vill ekki lenda í því sama og hér.
Bella Baldurs hefur mikinn áhuga á persónulegum þroska, samskiptum, samböndum, ástarmálum, deitmálum og kynlífi.
Hún byrjar hvern dag á núvitundaræfingu áður en hún rúllar sér sígarettu og hellir upp á tvöfaldan espresso.
