Við parið skelltum okkur í Laugarásbíó í gær og sáum Johnny English Reborn – kvikmynd um misheppnaða MI7 útsendarann sem klúðrar fleiri málum en leysir.
Johnny English er leikinn af Rowan Atkinson sem er hálfgerður Laddi þeirra Breta og hefur hann bæði komið fram í sjónvarpi og á hvíta tjaldinu.
Johnny fær það hlutverk í myndinni að stoppa alþjóðleg glæpasamtök sem ætla sér að myrða háttvirtan embættismann en eftir að hafa algjörlega klúðrað málunum í síðustu sendiför hefur MI7 takmarkaða trú á leyniþjónustmanninum – sem er kannski engin furða þar sem hann er einstaklega vitlaus.
Í myndinni fáum við að sjá 007 græjur, bíla og eru mörg atriðin stæling á þeim myndum. Atriðin eru sett upp á gamansaman hátt, kannski aðeins til að stríða háttvirta einkaspæjaranum James Bond, en á næsta ári á sá kappi 50 ára afmæli þannig að það er vel við hæfi að gera svolítið grín að honum og espa okkur upp í að hlakka til næstu James Bond myndar.
Ég hafði gaman af þessari mynd og það var stemning í salnum. Þegar myndin var búin klöppuðu allir þannig að fólki líkaði hún greinilega vel! Enda er hann svoddan kjáni hann Johnny og hann kemur manni til að hlæja.
Ég ætlaði samt ekki að þekkja Gillian Anderson (X-files skutlan) en hún lék yfirmann MI7 og þurfti ég að fara á IMDB til að athuga hvort þetta hefði verið hún – gellan lítur ekkert smá vel út!
Sigrún Þöll Þorsteinsdóttir (f.15 feb 1975 – d. 8 apríl 2014) bloggaði á Pjatt.is í rúmlega tvö ár.
Sigrún Þöll starfaði sem tölvunarfræðingur, var dellukona, tækjasjúk og fagurkeri af lífi og sál. Að eigin sögn fannst Sigrúnu gaman að hlaupa, hjóla, drekka kaffi, huga að heilsunni, prjóna, lesa, taka ljósmyndir, rækta garðinn sinn og fleira og fleira. Blessuð sé hennar minning. Sigrún verður ógleymanleg þeim sem kynntust þessari dásamlegu konu.
