Morgunmatur er mikilvægasta máltíð dagsins. Hollur og rétt samsettur morgunmatur kemur jafnvægi á blóðsykurinn og gerir okkur kleift að byrja daginn af fullum krafti.
Uppáhalds morgunmaturinn minn þessa dagana er kaldur mangó- og hindberja hafragrautur að hætti Rikku.
Grauturinn er hollur og alveg afskaplega bragðgóður. Svei mér þá, ég gæti borið hann fram sem eftirrétt.
- 60 g tröllahafrar
- 1 msk Now Triple Omega fræ blanda
- 1 msk kókosmjöl
- 20 g frosið mangó
- 20 g fersk eða frosin hindber
- 100 ml möndlumjólk
- 6 dropar hindberjastevía
Þú hellir tröllahöfrunum í sultukrukku. Bætir við fræblöndunni og kókosmjölinu og hristir saman.
Því næst blandarðu frosnu ávöxtunum saman við og hellir möndlumjólkinni út á ásamt hindberjastevíunni. Lokar krukkunni og geymir inn í ísskáp í 30-60 mínútur. Svo getur þú skreytt grautinn með t.d. jarðaberjum og bláberjum.
Það má útbúa grautinn kvöldið áður og þar sem ég er alltaf á hlaupum er afar hentugt fyrir mig að geta gripið grautinn með mér tilbúinn í krukkunni.
Frábært að byrja daginn á köldum mangó- og hindberja hafragraut!
Fanney hefur skrifað á Pjattið frá 2012. Hún skrifar mest um andlegu hliðina og lífsstílstengd mál. Fanney er viðskiptafræðingur og starfar sem slíkur hjá Markhóli markþjálfun. Hún býr í 105 Rvk ásamt sambýlismanni sínum Óskari Arnarsyni. Fanney er með sól í fiskum en er rísandi bogmaður.
