„Ef ég hefði verið spurð fyrir þremur mánuðum hefði ég ekki sagst vera mikil áhugamanneskja um hjólreiðar. Í dag er ég hins vegar byrjuð að hjóla reglulega og orðin mjög áhugasöm en ég er algjör byrjandi í þessu.  Ég sé ekki fyrir mér að verða keppnismanneskja í greininni en þetta er frábært áhugamál,“ segir Ása sem fátt stoppa sig þrátt fyrir byrjendabraginn.

„Þetta er búið að vera hark síðustu vikur þegar ég hef lent í roki rigningu frosti og hagléli, allt í sama hjólatúrnum en núna með hækkandi sól verður þetta bara betra og hjólatúrunum mun fjölga hratt. Reyndar keppti ég í þríþraut við vinkonur mínar þegar ég var gæsuð, þá prófaði ég að hjóla í keppni og fannst það ótrúlega gaman!“

„Ég sá þessa ferð auglýsta hjá ÚÚ og fannst ótrúlega spennandi, það sem heillaði mig líklega fyrst var að komast í sjö daga húsmæðraorlof til Mallorca! Ég elska frí sem snúast um útiveru og hreyfingu en eins og flestir Íslendingar hafa gert í vetur sá ég líka sólina fyrir mér í hyllingum. Mér hefur alltaf fundist gaman að hjóla og ákvað að þetta skyldi verða byrjunin á mínum hjólaferli. Ágætt að byrja með stæl á Mallorca þar sem atvinnumenn í heiminum koma saman til að æfa,“ segir Ása sem ætlar að skella sér í ferðina með nokkrum vinkonum. Líklega eru um tuttugu konur skráðar í ferðina en vonandi bætast enn fleiri skemmtilegar í hópinn!“

„Ég lít svo á að ég muni fá mun meira út úr ferðinni með því að vera í ágætis formi. Ég myndi segja að það væri æskilegt að vera í formi en hjólaformið kemur svo bara.  Það verður hjólað á svokölluðum „racer“ hjólum  í 3-6 klukkutíma á dag svo það er gott að vera búin að æfa sig og prófa þannig hjól. Ég hef sjálf aðallega verið að hlaupa og í styrktarþjálfun hjá G-Fit þegar tími gefst en er að koma mér í hjólaform þessa dagana. Markmiðið er að vera í mun betra formi í lok ferðar og hjóla mikið í sumar í íslensku sólinni,“ segir þessi hressa hjólreiðakappi að lokum en þú getur lesið meira um þessa fyrstu stelpuhjólaferð Íslendinga hér á heimasíðu Úrval Útsýn.