Björg Magnúsdóttir (28): ,,Það er stórhættulegt að umgangast mig”

Ekki þessi týpa má vafalaust kalla bók sumarsins 2013 en Björg Magnúsdóttir hefur verið vinsæll pistlahöfundur á liðnum misserum. Skáldsagan Ekki þessi týpa er frumraun hennar.

Frekar mætti segja að Ekki þessi týpa sé skáldsaga með sterka tengingu við samtímann. Íslenskt djamm, samskipti kynjanna og lífsgæðakapphlaupið eru meðal annars það sem Björg vefur inn í söguna ásamt frábærlega skemmtilegum aðalpersónum. Æðibunugangur Bjargar og hennar vina var innblástur af mörgum senum í bókinni sem oft á tíðum valda ofsafengnum hlátursköstum. Ég spjallaði við Björg og spurði hana úti í bókina, skvísubókastimpilinn og fyrst hún væri ekki þessi týpa, hvaða týpa þá?

1. Hvað kom til að þú smelltir í þessa bók?

Það hefur alltaf verið á bucket listanum hjá mér. Ég var dálítið lengi að finna út úr því hvers konar stöffi ég ætti að byrja á en markmiðið var fyrst og fremst að byrja einhvers staðar. Enda er óendanlega svalt að hafa gefið út bók.

2. Ekki þessi týpa – hvaða týpa þá?

Vá, þetta er besta spurning sem ég hef fengið! Ég í það minnsta veit alltaf miklu betur hvað ég vil ekki heldur en beinlínis hvað ég vil. Með þessari aðferð færist ég yfirleitt nær því besta og eftirsóknarverðasta. Æi, verð ég ekki bara að reyna að gera tilraun til þess að svara þessu almennilega í næsta verki?

3. Ertu sjálf búin að vera lengi á lausu og eru lýsingarnar að einhverju leyti fengnar úr þínum eigin reynsluheimi?

Ég er búin að vera á lausu í eitt ár síðan síðasta ástarsambandi mínu lauk með afar dramatískum hætti. Djók. Við erum geðveikt góðir vinir, alltaf að detta í lunch og svona. Já, lýsingarnar eru margar fengnar úr eigin reynsluheimi… og svona reynsluheimi fólks í kringum mig. Það er náttúrulega alveg stórhættulegt að umgangast mig.

4. Á einhver vinkvenna þinna eftir að berja þig í hausinn með bókinni?

Það er aðeins stirt á milli á einhverjum stöðum. Veit ekki hvort ég á að kenna bókinni um það eða æðibunugangi mínum og fólks í kringum mig um… Lýst betur á fyrrnefnda kostinn.

5. Ertu búin að skrifa lengi og eru plön um að gefa út fleiri bækur?

Alveg frá því ég lærði að skrifa hefur þetta verið mitt helsta áhugamál. Já. Mikil áform um mjög margar bækur. Bæði fleiri í þessum anda og allt annað stöff.

6. Hvaða rithöfunda lestu sjálf?

Murakami, Ayn Rand, Jón Kalmann, Auði Jóns, Kristínu Marju, Terry Pratchett, Paulo Coelho, Isabel Allenda og fleiri og fleiri.

7. Hvernig finnst þér að bókin þín sé kölluð “skvísubók”?

Það truflar mig alveg smá. Einfaldlega af þeirri ástæðu að mér finnst þetta takmarkandi flokkun og í framhaldinu takmarkandi markhópur. Þetta er ekki skvísubók nema þá að við látum fylgja með að skvísur séu fólk af báðum kynjum á öllum aldri. Þetta er fyrst og fremst skáldsaga um ungar konur eftir unga konu sem allir mega lesa, bæði skvísur og þeir sem líta ekki á sig sem skvísur. Þetta er eins og að tala um Harry Potter sem barna- eða unglingabækur en þeir sem hafa sogast inn í þann snilldarlega heim vita að hún á jafnvel erindi við þá sem eru ekki börn eða unglingar nema kannski í anda. Mér finnst óþarfi að flokka allt í ræmur… en er auðvitað ekki sérfræðingur í málefninu. Ég vil samt ekki að fyrirfram stimplun fæli lesendur frá.

8. Eitthvað að lokum?

Ég verð að deila því með lesendum hversu lánsöm ég er að þekkja heiðurshjónin, mína lagalegu talsmenn og stórvini, Elínu Ósk og Kára Hólmar, sem hafa verið ómetanleg þegar kemur að því að verjast yfirvofandi málshöfðunum vegna útgáfu bókarinnar. Þau eru svona fólk sem allir ættu að leggja sig fram við að kynnast. Takk fyrir.

Anna Margrét

Anna Margrét er fædd í Reykjavík árið 1987, en hefur alið manninn í Svíþjóð, Suður Ameríku og víðar.
Anna er krabbi, og þykja þeir hinir kátustu. Tíska, förðun, jafnrétti, skrif og ferðalög um Afríku eru nokkur af hennar áhugamálum.