TOP

UPPSKRIFT: Pepperóníborgari á grillið og grillaðir, stökkir kartöflubátar

Fátt er girnilegra af grillinu en hnausþykkur, heimagerður hamborgari, blandaður ferskum kryddjurtum, prýddur lauk, salati og fleiru.

Enda er hamborgari ekki sama og hamborgari eins margvíslegir og þeir geta verið.

Hér gef ég uppskrift að svakalega djúsí hamborgara sem er undir töluverðum ítölskum áhrifum hvað bragðið varðar en auk kryddjurtanna, blandaði ég pepperóníbitum og pítsusósu við hakkið.

Þetta kom mjög vel út og er skemmtileg tilbreyting. Gott er að bera fram grillaða kartöflubáta með borgurunum. Uppskriftin er fyrir fjóra hamborgara.

  • 500 g nautahakk
  • 50-60 g pepperóní, saxað smátt
  • 1 dl pítsusósa
  • handfylli ferskar kryddjurtir, sbr. basilíka og/eða steinselja, skorið smátt
  • (notið annars 1-2 msk. þurrkaðar kryddjurtir ef þær fersku eru ekki við höndina)
  • ½ dl graslaukur eða skallotlaukur, smátt saxaður
  • salt, grófmalaður pipar, pítsukrydd eða ítölsk kryddblanda að smekk
  • ferskur mozzarellaostur, sneiddur

Blandið öllu mjög vel saman og mótið þykka og fína hamborgara. Grillið í 2-3 mínútur á hvorri hlið, fer eftir stærð og þykkt borgaranna. Setjið ostsneið ofan á borgarana rétt í lok eldunartímans og látið ostinn byrja að bráðna. Hitið hamborgarabrauðin, smyrjið þau pítsusósu, setjið grænt salat og síðan hamborgarann. Mjög gott er að setja rauðlaukssneiðar á toppinn og skreyta með basilíku.

Þær sem eru að telja hitaeiningarnar gætu auðveldlega sleppt brauðinu og aukið salatið í staðinn. Og allir sáttir!

Grillaðir, stökkir kartöflubátar

Stökkir, vel kryddaðir kartöflubátar eru girnilegir og ljúffengir. Sjóðið kartöflur í 8-10 mínútur. (eftir stærð) Látið mesta hitann rjúka úr þeim og skerið í báta. Setjið í eldfast mót eða ofnskúffu sem þakin hefur verið bökunarpappír. Dreypið ólífuolíu yfir kartöflubátana og kryddið með grófu salti og nýmöluðum pipar. Einnig er gott að nota hvítlaukskrydd. Bakið við 225 gráður í um 25 mínútur eða þar til bátarnir eru orðnir fallega ljósbrúnir og stökkir.

Njótið!

Rósa starfaði um árabil sem blaða- og fréttamaður lengst af hjá fréttastofu Stöðvar tvö og Bylgjunnar. Hún hefur skrifað um mat og matargerð í ýmis blöð og tímarit, þar af í rúman áratug fyrir Gestgjafann. Rósa gaf út sína fyrstu matreiðslubók, Eldað af lífi og sál, haustið 2009. Nú starfar Rósa við ritstörf hjá Bókafélaginu og er bæjarfulltrúi í Hafnarfirði.