Það elska allir sætar kartöflur enda eru þær bæði einstaklega bragðgóðar og á sama tíma mikil heilsubót.

Þær fita jafnframt ekki með sama hætti og venjulegar kartöflur enda minni mjölvi í þeim og hærra magn kolvetna enda innihalda þær minna vatn. Þær innihalda jafnframt meira af trefjum, C-vítamíni og E-vítamíni heldur en venjulegar kartöflur.

Hér er mjög girnileg uppskrift af Gott í Matinn en þú ættir að geta boðið hvaða grænmetisætu sem er í mat með stolti ef þú berð þennan rétt fram. Þær eru jafnframt mjög góðar sem meðlæti með hvaða fisk eða kjötrétti sem er.

Sætkartöflubollur

Bollurnar

2 stk meðalstórar sætar kartöflur
1½ tsk kummin
2 stk lítil hvítlauksrif, fínsöxuð
1½ tsk kóríander
2 lúkur af fersku kóriander, saxað
• safi úr ½ sítrónu
2 dl heilhveiti
• sjávarsalt og svartur pipar
• ólífuolía
• sesamfræ

Salat

100 g klettasalat
1 stk grænt epli, skorið í þunnar sneiðar
• örlítil ólífuolía
• örlítill sítrónusafi

Sýrð mangósósa

1 stk vel þroskað mangó, skorið í bita
2 msk jalapeno í krukku
1 stk skallottulaukur, saxaður
1⅓ dl sýrður rjómi 10% (1 1/3 dl)
• sjávarsalt á hnífsoddi
• safi úr ½ límónu

Aðferð

Bollur1. Stillið ofninn á 220°C. Bakið kartöflurnar í 45 mínútur eða lengur. 2. Látið kartöflurnar kólna og takið síðan hýðið af þeim. 3. Setjið kartöflumaukið í skál ásamt kummin, hvítlauk, kóríander, sítrónu og heilhveiti. 4. Maukið vel og smakkið til með salti og pipar. Geymið í frysti í 20-30 mínútur. 5. Hitið ofninn í 200°C. Mótið litlar bollur með matskeiðum og setjið á bökunarplötu klædda bökunarpappír með smá ólífuolíu á. Ef deigið er of blautt má bæta aðeins meira heilhveiti út í. 6. Sáldrið sesamfræjum yfir og bakið í 15-20 mínútur eða þar til gullnar. Berið fram með mangósósu, salati og eplaskífum.

Sýrð mangósósa:

1. Maukið öll hráefnin sem fara í sósuna með töfrasprota eða setjið í matvinnsluvél. Berið fram með bollunum.

Salat:

1.  Setjið smá ólífuolíu og sítrónusafa yfir salatið. Raðið á fat eða diska og raðið eplaskífum yfir. 2. Leggið bollurnar ofan á og berið fram með mangósósunni.

Höfundur: Erna Sverrisdóttir