Gróf tómatapizza með mozzarella/kotasælu, ofnbökuðum kirsuberjatómötum og grænmetissalati.

pizza

Þessi er bæði góð, girnileg og heilsusamleg og það verður ljúft að njóta hennar…Til dæmis með góðu rauðvíni og í fallegum félagsskap.

Þetta verður pizza sumarsins. Hér er uppskriftin… stútfull af vítamínum og bætiefnum.

Botn

3½ dl heilhveiti
½ tsk sjávarsalt
• vínsteinslyftiduft/lyftiduft á hnífsoddi
1½ dl vatn
4 msk tómatamauk

1. Blandið fyrstu þremur hráefnunum saman í skál.
2. Setjið vatn og tómatamauk saman við. Hærið. Bætið meira heilhveiti saman við ef þurfa þykir.
3. Hnoðið létt og skiptið deiginu í 6 parta. Fletjið hvern part út í þunnan hring sem er u.þ.b. 22 cm í þvermál.
4. þurrsteikið á pönnu, báðum megin.

Ofnbakaðir kirsuberjatómatar

300 g kirsuberjatómatar, skornir í tvennt
½ tsk þurrkað oreganó
• smá sjávarsalt
• smá svartur pipar
¼ tsk hrásykur
1 msk ólívuolía

1. Stillið ofninn á 220°.
2. Setjið tómatana á bökunarplötu klædda bökunarpappír. Sáldrið kryddi og sykri yfir. Hellið olíunni jafnt yfir. Bakið í 20-25 mínútur.

Grænmetissalat

100 g klettasalat
1 stk lárpera, skorin í þunnar sneiðar
300 g ofnbakaðir kirsuberjatómatar
3 msk ristaðar furuhnetur
2 stk mozzarellakúlur, rifnar niður eða 250 g kotasæla
1 stk búnt fersk basilíka, u.þ.b. 40 g
1½ tsk rauðvínsedik
6 msk ólívuolía
• sjávarsalt og svartur pipar eftir smekk

Maukið basilíkuna og rauðvínsedikið í matvinnsluvél eða með töfrasprota. Hellið olíunni saman við á meðan vélin er að vinna. Smakkið til með salti og pipar. Leggið salatið á pizzubotnana. Raðið tómötum, osti og lárperu yfir. Dreifið salatsósunni jafnt yfir pizzurnar. Sáldrið loks furuhnetunum yfir.

Njótið í góðum selskap meðan hlustað er á góða tónlist… helst með ítölsku ívafi.

Höfundur: Erna Sverrisdóttir og fleiri  uppskriftir HÉR